சுயமரியாதை ஒளியைப் படரச் செய்த கலங்கரை விளக்கம்: பெரியாரின் பெருஞ்சிறப்புகள் அறிவோம்

சுயமரியாதை இயக்கத்தைத் தோற்றுவித்து, சமத்துவத்தையும், பகுத்தறிவு அணுகுமுறையையும் இம்மண்ணில் விதைத்தவர் தந்தை பெரியார். ஜாதிய ஒடுக்குமுறைக்கு எதிராகத் தொலைநோக்குப் பார்வையுடன் பல போராட்டங்களை முன்னெடுத்தவர் அவர். ஒடுக்கப்பட்ட சமூகங்களை உயர்த்தி, பாலின உரிமைக்காகவும், கல்விக்காகவும், கருத்துரிமைக்காகவும் போராடியவர் பெரியார்.

திராவிடர் இயக்கத்தின் தலைவராக சமூகநீதிக்காகப் போராடியதுடன், அனைத்து வகையான ஒடுக்கு முறைகளையும் எதிர்த்துக் கருத்துப் பிரச்சாரம் செய்தவர் பெரியார். பெண்ணுரிமைக்காகவும், பாலின சமத்துவத்திற்காகவும் நூறாண்டுகளுக்கும் முன்பே குரல் கொடுத்த முன்னோடி தந்தை பெரியார். பெண்கள் தங்கள் விடுதலைக்காகவும் காலங்காலமாக தொடர்ந்து வரும் பழமையான அடக்கு முறைகளை எதிர்த்தும் போராடி, அதிகாரப் பகிர்வின் மூலம் தங்களுக்கான சிறப்பான எதிர்காலத்தை உருவாக்கிக் கொள்ளுவதில், முக்கியப் பங்காற்ற முன்வர வேண்டும் என்று கருதினார். அவரது முற்போக்கான சிந்தனைகள் பெண்களின் முன்னேற்றத்திற்காகப் பாடுபட்டுவரும் பெண் விடுதலை இயக்கங்களுக்கு இன்றும் ஊக்கமளித்து வருகின்றன.

பெரியார் உலகம் - சமத்துவம், சுயமரியாதை, பகுத்தறிவு - இம்மூன்றையும் வலியுறுத்தியவர் தந்தை பெரியார். அவருடைய சிந்தனைகளைப் போற்றவும், உலகுக்கு அவற்றை உரத்தக் குரலில் எடுத்துரைக்கவும் உருவாகிவரும் உன்னதத் தலமே பெரியார் உலகம்.

தந்தை பெரியாரின் உயரிய சிந்தனைகளை அடையாளப்படுத்தும் வகையில் இதன் மய்யப் பகுதியில் 95 அடி உயரத்தில் பெரியாரின் பேருருவச் சிலை எழவிருக்கிறது. பார்வையாளர்களின் சிந்தனைக்கு விருந்தளித்து, அவர்களை ஈர்க்கும் வகையில் உலகில் வேறு எங்கும் காணமுடியாத தனித் தன்மையுடன் இது அமைக்கப்படுகிறது. இனிவரும் உலகின் புதிய தலைமுறையினரையும் பெரியார் உலகத்தின் கலை நுணுக்கம் கவர்ந்திழுக்கும். பண்பாட்டுச் சிறப்புகளும், கட்டிட எழிலும், சமூகச் செயல்பாடு களும் சங்கமிக்கும் இடமாக ‘பெரியார் உலகம்’ இருக்கும்.